کراچی (نیوز ڈیسک) نیشنل انسٹی ٹیوٹ آف پبلک ایڈمنسٹریشن (نیپا) میں 39ویں سینئر مینجمنٹ کورس (SMC) کی گریجویشن تقریب منعقد ہوئی۔ گورنر سندھ سید محمد نہال ہاشمی نے بطور مہمانِ خصوصی شرکت کی۔ ڈائریکٹر جنرل نیپا ڈاکٹر سید سیف الرحمان نے گورنر سندھ اور دیگر معزز مہمانوں کا استقبال کیا۔
گورنر سندھ سید محمد نہال ہاشمی نے اپنے خطاب میں کہا کہ انہیں اس تقریب میں شرکت پر خوشی ہے اور انہوں نے نیپا کی انتظامیہ اور فارغ التحصیل افسران کو کورس کی کامیاب تکمیل پر مبارکباد دی۔ انہوں نے کہا کہ نیپا مستقبل کے قابل اور مؤثر سول سرونٹس تیار کرنے میں اہم کردار ادا کر رہا ہے۔
ڈی جی نیپا ڈاکٹر سید سیف الرحمان نے خطاب کرتے ہوئے کہا کہ یہ موقع محض ایک تعلیمی کورس کے اختتام کا نہیں بلکہ عزم، قیادت اور عوامی خدمت کے جذبے کی تکمیل کا دن ہے۔ انہوں نے کہا کہ فارغ التحصیل افسران پر اداروں کو مضبوط بنانے اور دیانت داری کے ساتھ عوام کی خدمت کرنے کی بڑی ذمہ داری عائد ہوتی ہے۔
انہوں نے مزید کہا کہ آج کے افسران ایک ایسے دور میں خدمات انجام دے رہے ہیں جہاں موسمیاتی تبدیلی، ٹیکنالوجی کی ترقی، سائبر خطرات، معاشی غیر یقینی صورتحال اور عوامی توقعات میں اضافہ جیسے چیلنجز درپیش ہیں۔ انہوں نے کہا کہ جدید سول سرونٹ کے لیے اسٹریٹیجک سوچ، جذباتی ذہانت اور تکنیکی مہارت ناگزیر ہے۔
تقریب کے اختتام پر گورنر سندھ اور ڈی جی نیپا نے 39ویں سینئر مینجمنٹ کورس کے شرکاء میں اسناد تقسیم کیں۔
About the Author
